ကုလသမဂ္ဂ လူ့အခွင့်အရေးအဖွဲ့၏ မြန်မာ့လူ့အခွင့်အရေးဆိုင်ရာ အထူးသံတမန် မစ္စတာ သောမတ်အိုဟေး၊ကွင်တားနားသည် ပထမအကြိမ် ပြည်ထောင်စုလွှတ်တော် ဒုတိယပုံမှန်အစည်းအဝေး ဒုတိယနေ့၌ လွှတ်တော် သို့ရောက်ရှိကာ ပြည်သူ့လွှတ်တော် ကိုယ်စားလှယ် ၁၉ ဦးတို့နှင့် လွှတ်တော် ဇမ္ဗူသီရိ ဧည့်ခန်းဆောင်၌ နှစ်နာရီခန့် တွေ့ဆုံဆွေးနွေးခဲ့သည်။
ကိုယ်စားလှယ်များ ပြောပြကြသည့် ဒေသတွင်းအခက်အခဲများအကြောင်းကို အထူးစိတ်ဝင်စားကြောင်း၊ ကုလသမဂ္ဂသို့ ပြန်လည် တင်ပြမည်ဖြစ်ကြောင်း၊ လွှတ်တော်ကိုယ်စားလှယ်တို့သည် လူထုက ရွေးချယ်တင်မြှောက်ထားသူများ ဖြစ်သောကြောင့် လူထု ကိုယ်စား၊ လူထု၏အခက်အခဲများကိုဖြေရှင်းပေးရမည့် တာဝန်ရှိကြောင်း၊ ၎င်းတာဝန်ကို ရဲရဲဝံ့ဝံ့ ဆောင်ရွက်သွားကြစေလိုကြောင်း၊ မိမိတို့အနေဖြင့်လည်း အနီးကပ် စောင့်ကြည့်သွားမည်ဖြစ်ကြောင်း တိုက်တွန်း ပြောကြားခဲ့သည်ဟု အဆိုပါတွေ့ဆုံပွဲတွင်ပါဝင်ခဲ့သော ပြည်သူ့လွှတ်တော် ကိုယ်စားလှယ် ဦးစိုင်းဆောင်ဆီက မြန်မာတိုင်း(မ်)ကို ဖြေကြားသည်။
"မစ္စတာ ကွင်တားနားက လွှတ်တော်အစည်းအဝေး ဒုတိယနေ့ မနက်ပိုင်းမှာ ပြည်သူ့လွှတ်တော်ဥက္ကဋ္ဌ သူရဦးရွှေမန်းနဲ့ အရင် တွေ့ဆုံဆွေးနွေးခဲ့ပါတယ်။ ပြီးတော့ ပြည်ထောင်စုလွှတ်တော်နာယက ဦးခင်မောင်မြင့်နဲ့ ဆက်လက် တွေ့ဆုံပါတယ်။ အဲဒီလို အကြီးအကဲတွေနဲ့ တွေ့အပြီး မနက် ၁၀ နာရီခွဲကနေ ၁၂ နာရီခွဲအထိ ကျွန်တော်တို့ ကိုယ်စားလှယ် ၁၉ ဦးနဲ့ ဆက်တွေ့ပါတယ်"ဟု ၎င်းက ပြောကြားသည်။
မစ္စတာကွင်တားနားနှင့် တွေ့ဆုံဆွေးနွေးခဲ့ကြသော ကိုယ်စားလှယ်တို့မှာ တိုင်းရင်းသားနှင့် ဒီမိုကရေစီအင်အားစုပါတီ ၁၇ ပါတီမှ ၁၇ ဦး၊ ပြည်ခိုင်ဖြိုး ပါတီမှ တစ်ဦးနှင့် တစ်သီးပုဂ္ဂလကိုယ်စားလှယ်တစ်ဦးတို့ဖြစ်ကြောင်း သိရသည်။
"သူစိတ်ဝင်စားတာကတော့ အကျဉ်းသားတွေကိစ္စပါ။ လူ့အခွင့်အရေးနဲ့ ပတ်သက်ပြီး ကိုယ်စားလှယ်တွေအနေနဲ့ လွှတ်တော်ကို ဘာတွေ တင်ပြသွားဖို့ ပြင်ဆင်ထားသလဲလို့ သူက အားလုံးကိုမေးပါတယ်။ ကိုယ်စားလှယ်အများစုကတော့ ကိုယ့်ဒေသမှာကြုံ နေရတဲ့ ကိစ္စများကို ပြောပြကြတယ်။ "ကျွန်တော်ကတော့ အကြောင်းအရာနှစ်ခုပဲ သူ့ကိုပြောဖြစ်တယ်။ ပထမ အချက်က လက်နက် ကိုင်တွေနဲ့ ပဋိပက္ခဖြစ်တဲ့နေရာတွေမှာ ရေဘေးလေဘေး လိုမျိုး၊ဒုက္ခသည်စခန်းတွေ၊ဖွင့်ပေးသင့်တယ်။ နယ်စပ်မှာ သွားဖွင့်တာ မျိုးထက် တကယ်ကြုံတွေ့နေရတဲ့ ဒေသတွင်းမှာ ရှိတဲ့ မြို့ကြီးတွေမှာ ဖွင့်ပေးစေချင်တယ် လို့ ပြောဖြစ်တယ်"ဟု ဦးစိုင်းဆောင်ဆီ က မစ္စတာကွင်တားနားနှင့် လွှတ်တော် ကိုယ်စားလှယ်တို့ ဆွေးနွေးကြသည့် အကြောင်းအရာများကို ပြန်ပြောပြသည်။
၎င်းတင်ပြသည့် နောက်ထပ် အကြောင်းအရာမှာ ကျေးရွာအုပ်ချုပ်ရေးမှူးများ ရွေးချယ်သည့်ကိစ္စဖြစ်ကြောင်း၊ ယခင်က ဤသို့ ရွေးချယ်ခြင်း၌ လူထုဆန္ဒနှင့်အညီ ရွေးချယ်နိုင်ရန် ရေရာသေချာသော ရွေးချယ်နည်းမရှိခဲ့သော်လည်း ယခု ပြည်ထောင်စုလွှတ် တော်က ချမှတ်ပေးလိုက်သော ဥပဒေကြမ်းအရ ၁၀ အိမ် လူတစ်ဦး၊ အိမ် ၁၀၀ လူ ၁၀ ဦးမှသည် အချင်းချင်း လျှို့ဝှက်မဲစနစ် ဖြင့် လူထုဆန္ဒနှင့်အညီ ရွေးချယ်ခန့်အပ် နိုင်တော့မည်ဖြစ်၍ မိမိတို့ စိတ်သက်သာရာ ရရှိနိုင်သွားပြီဖြစ်သည်ဟု မစ္စတာ ကွင်တားနားကို ပြောပြခြင်းဖြစ်ကြောင်း သိရသည်။
"မစ္စတာကွင်တားနားက ရန်ကုန် UNDP ရုံးမှာ တိုင်းရင်းသားတချို့နဲ့ ၂၅ ရက်နေ့မှာ တွေ့ဖို့ချိန်းထားတယ်လို့လည်း ကြားသိရ ပါတယ်"ဟု ၎င်းက ဖြည့်စွက်ပြောကြားသည်။
မစ္စတာကွင်တားနား၏ ဩဂုတ်လ ၂၁ ရက်မှ ၂၅ ရက်အတွင်း မြန်မာနိုင်ငံ ခရီးစဉ်တွင် ငြိမ်းချမ်းရေးနိုဘယ်လ်ဆုရှင် ဒေါ်အောင်ဆန်း စုကြည်နှင့်လည်း တွေ့ဆုံနိုင်ရန် ရည်ရွယ်ထားကြောင်း အေအက်ဖ်ပီသတင်းဌာနက ဖော်ပြထားခဲ့သည်။
စိုးသန်းလင်း
No comments:
Post a Comment